"Est una richesa manna a tènnere una limba" (R.Soru)

"Est una richesa manna a tènnere una limba". Paule, 5 de Maju 2007
Cun custas paràulas su presidente de su Guvernu sardu Soru at serradu sos traballos de s'addòviu de Paule dedicadu a sa Limba Sarda Comuna.


Paule. "Est una richesa manna a tènnere una limba. Una richesa manna chi tenimus comente pòpulu". Sunt custas paràulas de su prèsidente de sa Regione sarda Soru chi at naradu a s'agabu de su cunvegnu "Le lingue dei sardi" su 5 de Maju a Paule. Unu cunvegnu dedicadu a una chirca sotziulinguìstica chi est istada fata dae sas universidades de Tàtari e de Casteddu e cummissionada dae sa Regione.

Non si fiat mai bida una cosa gosi in antis. Unu cunvegnu in ue relatores medas e sas pessones chi sunt intervènnidas ant allegadu no in sa limba ufìtziale, s'italianu, ma in sardu. Chie in campidanesu, chie in nugoresu, chie in logudoresu. Cadaunu at pòdidu impreare sa limba de sa tita. Est istada de seguru una cosa curiosa e originale meda. Interventos interessantes, a bortas polèmicos e cuntrastantes ma de seguru intzisivos galu de prus, ca fiant fatos in limba.

Duncas sa limba non prus comente unu fatu folclòricu ma comente unu mèdiu beru pro comunicare finas in cuntestos informales comente unu dibàtidu pùblicu. E pro sa prima borta finas unu presidente de Regione at faeddadu in sardu. Unu interventu intregu in campidanesu. Est partu a sa prima unu pagu birgongiosu, comente chi lu esserent ispogende. Ca l'at naradu issu puru chi su sardu est sa limba de sas emotziones e de sos sentimentos. Sa limba chi l'ant imparadu sa mamma e su babbu e duncas sa limba de su coro. "Est una richesa manna chi tenimus comente pòpulu chi si biet comente una natzione, cun un'identidade natzionale".

Soru s'est ammaniende a sa sèria pro sa chistione de sa limba. E duncas puntègiu in sos cuncursos pro chie chistionat e connoschet su sardu, su matessi tratamentu de unu chi connoschet s'inglesu. Crèditos formativos in iscola pro cussos istudentes chi connoschent sa limba. Non paret beru, ma l'amus intesu in medas e non pariat brullende. Ca l'at naradu issu etotu "S'importante non est a ddu chistionai ma a lu chistionai". At cumpresu bene su chi devet fàghere e at cumpresu s'importàntzia de sa limba in s'iscola. No est importante a nd'allegare de limba, ma tocat de allegare in limba in totu sos cuntestos, siat cussos informales siat cussos, mescamente, formales. Isperemus chi non siant petzi paràulas.

Juvanna Tuffu

fonte:www.tempusnostru.it